我嘅第一篇粵語博文

我只係一半嘅廣東人，我唔係好識講廣東話，但係唔知點解，最近鍾意咗研究呢個語言，尤其是粵語嘅漢字。諗起以前睇港劇嘅時侯，特別係戲入邊個啲角色佢哋講緊廣東話嘅時候，我心內邊會估，到底個啲廣東話係點寫？係乜嘢漢字寫嘅？係唔係同華語普通話嘅漢字一樣咧？（呢度嘅華語即係普通話/北方話，雖然我覺得噉嘅講法唔啱，因為廣東話係華語嘅一種。）

以前我一直以為廣東話同華語係用同樣嘅漢字，比如廣東話嘅「畀/俾」，我以為佢嘅漢字係「給」，直到我唱廣東歌時，發現原來「給」係讀 kap，唔係我以為嘅「畀/俾 bei」。原來粵語廣東話本身有自己嘅漢字書寫系統，係一種語言，並唔係乜嘢所謂嘅方言。

粵語俗稱廣東話，係漢民族語言系統嘅其中一種主要語言，流行於中國南方廣東廣西兩省、澳門、香港同埋世界各地嘅唐人社區。

講下馬來西亞嘅情況，除咗華語，呢度廣東話係唐人社區嘅強勢語言，尤其是吉隆坡到怡保，即成個中馬區，廣東話係社交語言，即喺出邊同陌生人買嘢、叫嘢食時用嘅話。唔似其他南方語言，比如客家話、潮州話、海南話淨係存在係屋企入邊。加上本地四個中文電台有三個係用廣東話為主，再加上港劇仲係呢度唐人比較鍾意嘅電視劇，種種原因令到廣東話響呢度非常流行。

好多人認為廣東話係方言，最大嘅原因係廣東話有音冇字，呢個諗法係錯誤嘅，因為我而家寫緊嘅係粵字，證明咗粵語係一種語言。粵語嘅歷史有兩千幾年，比起少過五百年歷史嘅普通話，粵語點會係方言咧？

今日就講咁多先，下次繼續。